Cila është koha më e mirë për të ushtruar?

Cila është koha më e mirë për të ushtruar?
04.02.2025

Ushtrimet e rregullta ndihmojnë në përmirësimin e shëndetit fizik dhe mendor. Studimet tregojnë se stërvitja e vazhdueshme mund të përmirësojë nivelet e kolesterolit, insulinës, gjendjen shpirtërore, cilësinë e gjumit dhe menaxhimin e peshës.

Si ushtrimet në mëngjes ashtu edhe ato në mbrëmje kanë përfitime. Stërvitja në mbrëmje mund të zvogëlojë rrezikun e vdekjes së parakohshme dhe të ndihmojë në kontrollin e nivelit të sheqerit në gjak, ndërsa stërvitja në mëngjes mund të përmirësojë shëndetin e zemrës.

Disa prova sugjerojnë se koha e ushtrimeve nuk ka shumë rëndësi, për sa kohë që stërviteni në mënyrë të rregullt. Koha më e mirë për stërvitje varet nga preferencat, qëllimet dhe orari juaj.

Përfitimet e ushtrimeve në mëngjes

Studimet tregojnë se ushtrimet në mëngjes mund të përmirësojnë shëndetin e zemrës dhe cilësinë e gjumit. Gjithashtu, mund të ndihmojnë në menaxhimin e peshës.

Një studim zbuloi se njerëzit që stërviteshin midis orës 7:00 dhe 9:00 të mëngjesit kishin një indeks më të ulët të masës trupore (BMI) sesa ata që ushtronin pasdite ose në mbrëmje. Studime të tjera kanë arritur në përfundime të ngjashme, duke treguar se ata që stërviten para mesditës humbin më shumë peshë sesa ata që ushtrohen pas orës 15:00.

Një tjetër studim zbuloi se personat që ushtroheshin në orën 7:00 të mëngjesit flinin më herët, zgjoheshin më pak gjatë natës dhe kishin një gjumë më të thellë krahasuar me ata që ushtronin pasdite. Po ashtu, u vërejt se ushtrimet në mëngjes ndihmojnë në uljen e presionit të gjakut me rreth 10%, një efekt që zgjat gjatë gjithë ditës.

Disavantazhet

Për disa njerëz, zgjimi herët për të ushtruar mund të jetë i vështirë. Gjithashtu, rreziku i lëndimeve mund të jetë më i lartë në mëngjes, veçanërisht nëse filloni me ushtrime intensive pa bërë një nxehmje të duhur. Në mëngjes, temperatura e trupit është më e ulët, ndaj muskujt dhe nyjet mund të jenë më të ngurtë.

Për të shmangur lëndimet, bëni ushtrime të lehta nxehjeje, si rrotullime të krahëve, ngritje të gjunjëve ose vrap të lehtë. Këto ndihmojnë në qarkullimin e gjakut dhe përmirësojnë fleksibilitetin.

Nëse ndiheni të lodhur në mëngjes, mund të konsumoni një vakt të lehtë para stërvitjes për të pasur më shumë energji.

Përfitimet e ushtrimeve në mesditë

Stërvitja në mesditë është ideale për ata që duan të përmirësojnë performancën atletike, pasi temperatura e trupit arrin kulmin në këtë periudhë të ditës.

Studimet tregojnë se forca dhe qëndrueshmëria janë më të larta midis orës 15:00 dhe 18:00. Për më tepër, disa kërkime sugjerojnë se koha optimale për shëndetin e zemrës është midis orës 11:00 dhe 17:00.

Disavantazhet

Një nga sfidat më të mëdha të ushtrimeve në mesditë është menaxhimi i kohës. Nëse punoni gjatë ditës, mund të jetë e vështirë të gjeni kohë për një stërvitje të plotë. Edhe nëse ushtroni gjatë pushimit të drekës, mund të duhet të shkurtosh kohën e stërvitjes për t’u përgatitur për punën pas saj.

Gjithashtu, mund të jetë më e vështirë të mbani një rutinë të qëndrueshme pasdite, pasi angazhimet e përditshme, si takimet apo aktivitetet familjare, mund ta prishin planin tuaj. Për ta shmangur këtë, mund të vendosni një orar të rregullt në kalendarin tuaj.

Përfitimet e ushtrimeve në mbrëmje

Një studim zbuloi se personat e moshës mesatare me mbipeshë që ushtronin në mbrëmje kishin 28% më pak gjasa të vdisnin nga ndonjë shkak, krahasuar me ata që stërviteshin në mëngjes ose pasdite.

Disa ekspertë sugjerojnë se ushtrimet në mbrëmje mund të jenë më të dobishme për kontrollin e sheqerit në gjak, veçanërisht për njerëzit me rezistencë ndaj insulinës. Stërvitja pas një vakti mund të ndihmojë në uljen e niveleve të glukozës. Një studim tjetër tregoi se stërvitja në mbrëmje mund të përmirësojë kontrollin e sheqerit në gjak tek njerëzit me diabet.

Gjithashtu, ushtrimet në mbrëmje mund të ndihmojnë në reduktimin e stresit dhe të shërbejnë si një mënyrë për t’u çlodhur pas një dite të lodhshme. Një studim tregoi se aktiviteti fizik i moderuar deri në intensiv, deri tre orë para gjumit, nuk ndikon negativisht në cilësinë e gjumit. Përkundrazi, mund të ndihmojë në zgjatjen e kohës së gjumit dhe në lehtësimin e procesit të të fjeturit.

Disavantazhet

Për disa njerëz, ushtrimet në mbrëmje mund të jenë shumë stimulues dhe të ndikojnë në vështirësinë për të fjetur. Gjithashtu, ato mund të reduktojnë kohën e gjumit nëse ushtrimi zgjat deri vonë në mbrëmje. Nëse ndjeni se stërvitja në mbrëmje ju ndikon në gjumë, provoni të ushtroni më herët gjatë ditës.

Cila është koha më e mirë për t’u ushtruar?

Përcaktimi i kohës ideale për stërvitje varet nga disa faktorë, si:

  • Orari juaj ditor – Zgjidhni një kohë kur keni më shumë mundësi të jeni të rregullt në ushtrime.
  • Cilësia e gjumit – Nëse keni vështirësi të flini pas ushtrimeve të mbrëmjes, provoni një stërvitje në mëngjes ose pasdite.
  • Temperatura e jashtme – Nëse ushtroni jashtë, merrni parasysh kushtet e motit. Në verë, mund të jetë më mirë të ushtroni herët në mëngjes ose vonë në mbrëmje për të shmangur të nxehtin.
  • Niveli i energjisë – Nëse ndiheni të lodhur në mëngjes, një stërvitje pasdite ose në mbrëmje mund të jetë më e përshtatshme për ju.

Përfundimi

Disa studime sugjerojnë se koha e ditës mund të ndikojë në rezultatet e ushtrimeve, por konsistenca është më e rëndësishme sesa koha kur ushtroheni. Për të arritur përfitimet më të mira, zgjidhni një orar që përputhet me stilin tuaj të jetesës dhe angazhimet e përditshme. Më e rëndësishmja është të qëndroni aktivë dhe të ushtroni në mënyrë të rregullt.

Të fundit

Më të lexuarat