1 në 10 banorë të Bashkimit Evropian është i vetmuar shumicën e kohës, sipas një raporti të ri

Projekti pilot i ri i Bashkimit Evropian mbi vetminë synon të monitorojë dhe të trajtojë mungesën në rritje të “interaksioneve kuptimplota sociale”.

Të paktën një në dhjetë banorë të Bashkimit Evropian është i vetmuar shumicën e kohës, sipas një raporti të ri mbi vetminë, i kërkuar nga Komisioni Evropian.

Rreth 13 për qind e banorëve të BE-së kanë deklaruar se ndihen të vetmuar shumicën ose gjatë gjithë kohës, në sondazhin e parë mbi vetminë në të gjithë BE-në, që përfshiu 25,000 njerëz.

Projekti u krye për të marrë një pasqyrë të “epidemisë së vetmisë” të shkaktuar nga bllokimet e zgjatura dhe izolimi gjatë pandemisë COVID-19.

Sipas raportit, vetmia është më e përhapur në Irlandë, ku rreth 20 për qind e njerëzve raportojnë se ndihen të vetmuar. Niveli më i ulët i vetmisë është vërejtur në Holandë, Çeki, Kroaci dhe Austri, ku më pak se 10 për qind e kampionit të anketuar ka raportuar ndjenja vetmie. Njerëzit që janë të vetmuar gjatë gjithë kohës ose shumicën e kohës, sipas raportit, kanë rreth 20% më shumë mundësi të përjetojnë simptoma depresioni.

“Vetmia nuk është thjesht një çështje private dhe individuale,” tha raporti.

“Ajo mund të pengojë kohezionin social dhe duhet konsideruar si një problem shoqëror dhe të trajtohet si i tillë.”

Çelësat për parandalimin e vetmisë

Faktorët kulturorë luajnë një rol të rëndësishëm në vetmi, theksohet në raport, përveç ngjarjeve në jetën e një individi.

“Situatat ekonomike të favorshme, si dhe sasia dhe cilësia e interaksioneve sociale, janë të rëndësishme kur bëhet fjalë për parandalimin e vetmisë,” shtohet në raport.

Përdorimi intensiv i mediave sociale gjithashtu ishte i lidhur me rritjen e ndjenjës së vetmisë, pasi faqet online “nuk ofrojnë intimitetin dhe cilësinë e interaksioneve jashtë linje”.

Vetmia ishte më e përhapur tek të rinjtë në krahasim me të moshuarit, pasi ngjarjet kryesore në jetë kanë tendencë të prishin rrjetet sociale dhe i bëjnë njerëzit të ndihen të vetmuar, theksohet në raport.

Raporti, megjithatë, pranon se pasojat e vetmisë ndryshojnë sipas moshës dhe se në asnjë mënyrë nuk mund të injorohet vetmia tek të moshuarit.

Anketat globale të viteve të fundit kanë theksuar vende evropiane si Italia si një nga ato me përqindjen më të lartë të vetmisë tek të moshuarit.

Një sfidë e madhe në adresimin e problemit të vetmisë buron nga stigma sociale dhe mungesa e ndërgjegjësimit, thuhet në raport, duke shtuar se 57 për qind e të anketuarve nuk ishin të vetëdijshëm për ekzistencën e metodave dhe politikave të ndërhyrjes.